ចាប់បានសាច់ខូចគុណភាពហួសដឺឡេ៣០ឆ្នាំ ជាង១០ម៉ឺនតោន
ខែមិថុនានេះ សមត្ថកិច្ចចិន បានរឹបអូសសាច់ក្លាសេខូចគុណភាពពីឈ្មួញ ២១ក្រុម នៅក្នុងខេត្តចំនូន១៤ រហូតជាង ១០ម៉ឺនតោន។ ក្រោយប្រតិបត្តិការដ៏កក្រើក គេរកឃើញថា សាច់ខូចគុណភាពទាំងនោះបានផលិតឡើងតាំងពីអំឡុងទសវត្សរ៍ឆ្នាំ១៩៧០។
រដ្ឋបាលគយចិន បានបញ្ជាក់ថា សាច់ខូចគុណភាពដែលរឹបអូសបានទាំងអស់ មានទម្ងន់សរុប ១សែនតោន ដែលត្រូវគេក្លាសេរហូតដល់កក ដើម្បីការពារកុំឲ្យស្អុយរលួយ។ ទំនិញខូចគុណភាពទាំងនោះ រួមមានជើងមាន់ សាច់គោ និងសាច់ជ្រូក ដែលមានតម្លៃសរុប ៣ពាន់លានយាន់(៤៨៣លានដុល្លារ)។
សាច់ហួសកាលបរិច្ឆេទ ត្រូវគេដាក់សារធាតុគីមី ព្រមទាំងដាក់ថ្នាំធ្វើឲ្យស ដើម្បីរក្សាគុណភាពបានយូរ និងនៅស្រស់ពេលលក់ទៅឲ្យអ្នកទិញ។ ឈ្មួញទុច្ចរិតបានទទួលការចំណេញយ៉ាងខ្ពស់ ពីបណ្ដាញលក់ដូរទំនិញផ្លូវងងឹតនេះ។ ពួកគេបានទិញសាច់ខូចគុណភាពក្នុងតម្លៃថោកៗពីបណ្ដាប្រទេសជិតខាង រួចនាំចូលចែកចាយនៅហុងកុង ដោយរក្សាទុកក្នុងកុងតឺន័រក្លាសេ។
បន្ទាប់មក សាច់ទាំងនោះ ត្រូវនាំចូលដោយខុសច្បាប់មកប្រទេសវៀតណាម ដើម្បីស្វែងរកទីតាំងជិតៗនាំចូលចែកចាយតាមបណ្ដាក្រុងនានាក្នុងប្រទេសចិន ដែលនៅជាប់ព្រំដែនវិញ។ អ្នកជំនាញមួយចំនួន បានស្នើឲ្យអាជ្ញាធរបង្កើតបណ្ដាញទូទាំងប្រទេស ជាពិសេសនៅតាមព្រំដែន ដើម្បីគ្រប់គ្រងការនាំចូលសាច់ខូចគុណភាព លើសកាលកំណត់រាប់ទសវត្សរ៍នេះម្ដងទៀត៕
ចុចអាន៖ ស្រោមអនាម័យក្លែងក្លាយជិត ៣៥លានស្រោម ត្រូវគេចាប់បាន
ចុចអាន៖ អង្ករក្លែងក្លាយធ្វើពីប្លាស្ទិកកំពុងរីករាលដាលនៅអាស៊ី
ប្រែសម្រួល៖ គង់ វិសាល
ប្រភព៖ CCTV
