Raymond Lam ប្រេះឆ្អឹងកជើងអំឡុងពេលថតរឿង
តារាសម្ដែងហុងកុង Raymond Lam បានរងរបួសប្រះឆ្អឹងកជើងខាងឆ្វេង អំឡុងពេលកំពុងថតរឿងថ្មីរបស់គាត់ដែលនិយាយពីសម័យចិនដីគោកមានចំណងជើងថា “Six doors” នៅទីក្រុង Hendian។
មុនពេលចាប់ផ្ដើមសម្ដែងតារាចម្រៀង និង សម្ដែងនេះបានតាំងចិត្តរំលឹកខ្លួនត្រូវតែមានការប្រុងប្រយ័ត្នកុំឲ្យជួបឧបទ្ទវអ្វីឲ្យសោះ។ ទោះជាយ៉ាងណាក៏ដោយ ពីរបីថ្ងៃមុនពេលការសម្ដែងពិតប្រាកដមកដល់គាត់ក៏បានជួបរឿងដែលមិនចង់ជួបដោយបានរអិលធ្លាក់លើក្រួសនៅជិតកន្លែងថតហើយធ្វើឲ្យរងរមួលជើងខាងឆ្វេង។
តារាវ័យ៣៥ឆ្នាំគិតថានេះគ្រាន់តែជារបួសតិចតួចតែប៉ុណ្ណោះ។ គាត់គ្រាន់តែឲ្យមិត្តរួមការងារមករុំលើផ្នែកដែលមានរបួស។ បន្ទាប់មកនៅថ្ងៃបន្ទាប់ Raymond Lam មានអារម្មណ៍កាន់តែឈឺចុកចាប់ខ្លាំងឡើងៗលើមុខរបួស។ ប៉ុន្តែគាត់នៅតែបន្តថតរឿងជាធម្មតាទាំងខ្លួនមានរបួស។
បន្ទាប់ពីការថតរឿងចប់ម្ចាស់ពានតារាចម្រៀងប្រជាប្រិយភាពឆ្នាំ ២០១០ បានទៅមន្ទីរពេទ្យដើម្បីឲ្យគ្រូពេទ្យឆ្លុះមើលឆ្អឹងតាមកាំរស្មី X-ray ។ ក្រោយពីការពិនិត្យរួចរាល់ គ្រូពេទ្យបានប្រាប់ថាគាត់បានប្រេះឆ្អឹងកជើងខាងឆ្វេង ហើយរបួសនេះត្រូវព្យាបាលរយៈពេល៦សប្ដាហ៍។
ឮដំណឹងនេះភ្លាម មិត្តស្រីរបស់ Raymond គឺតារាសម្ដែង Karena Ng បានជិះយន្តហោះទៅកន្លែងថតរឿងដើម្បីមើលស្ថានភាពមិត្តប្រុស។
Raymond Lam មានអារម្មណ៍មិនសប្បាយចិត្តជាខ្លាំងដែលរបួសនេះបានធ្វើឲ្យប៉ះពាល់ដល់ការថតរឿងរបស់គាត់។ ប៉ុន្តែចិត្តជាតារាសម្ដែងគាត់បានទទូចថតឈុតកាប់ចាក់មួយចំនួនដោយខ្លួនឯងតាមអាចដែលធ្វើទៅបាន។ ហើយមានឈុតតិចតួចដែលត្រូវជំនួសដោយតួជំនួស៕
អាន៖ អ្នកនិពន្ធចម្រៀងក្នុងរឿងកប៉ាល់ Titanic ស្លាប់ក្នុងហេតុការណ៍ធ្លាក់យន្តហោះ
ប្រែសម្រួល៖ ហេង សុធារិទ្ធិ
ប្រភព៖ asianpopnews
