ក្រុមចោរ៦នាក់ចូលលួចឥវ៉ាន់ក្នុងរោងចក្រ វាយថៅកែប្តី-ប្រពន្ធជាជនជាតិចិនរបួសធ្ងន់ សំណាងអាក្រក់ជនសង្ស័យម្នាក់ផ្លោះរបងធ្លាក់បាក់ជើងពលរដ្ឋចាប់ឲ្យប៉ូលីស
ភ្នំពេញ៖ ក្រុមចោរចំនួន៦នាក់ បានធ្វើសកម្មភាពចូលលួចឥវ៉ាន់នៅក្នុងរោងចក្រ ផលិតប្រអប់ភ្លើងមួយកន្លែង ដែល មានថៅកែជាជនជាតិចិន តែត្រូវម្ចាស់ដឹងខ្លួនទាន់ក៏ប្រតាយប្រតប់គ្នា បណ្ដាលឲ្យជនសង្ស័យម្នាក់រងរបួសរត់ មិនរួច ក៏ត្រូវប្រជាពលរដ្ឋចាប់ប្រគល់ឲ្យសមត្ថកិច្ច។ ប៉ុន្តែករណីនេះ ក្រុមចោរបានវាយជនរងគ្រោះ២នាក់ប្តី-ប្រពន្ធ រហូតរង របួសធ្ងន់ទៀតផង។ ហេតុការណ៍នេះកើតឡើង នៅម៉ោង២ និង២០នាទីរំលងអាធ្រាត្រឈានចូលថ្ងៃទី១២ ខែសីហា ឆ្នាំ២០១៦ នៅចំណុចរោងចក្រផលិតប្រអប់ភ្លើងមួយ ជាប់របងវត្តអង្គតាមិញ ស្ថិតក្នុងភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ ។
ប្រជាពលរដ្ឋនៅកន្លែងកើតហេតុបានឲ្យដឹងថា មុនពេលកើតហេតុគាត់បានឮសម្លេងឆ្កែព្រូសយ៉ាងខ្លាំង និងឮ សម្លេង ស្រែកឲ្យជួយផង ទើបប្រជាពលរដ្ឋបាននាំគ្នាចេញមកមើល ឃើញមានបុរសម្នាក់ខ្លួនប្រលាក់សុទ្ធតែឈាមបែកមុខបែកមាត់ រងរបួសធ្ងន់ ដេកនៅលើស្មៅជាប់របងរោងចក្រខាងក្រោយផ្ទះប្រជាពលរដ្ឋ ឃើញបែបនេះក៏បាន សួរនាំហើយបុរសនោះប្រាប់ថា ពួកគេមានគ្នា៦នាក់ចូលលួចក្នុងរោងចក្រ ដោយខ្លួនជាអ្នកនៅចាំមើលផ្លូវ និងចាំម៉ូតូ ចំណែកបក្សពួក៥នាក់ទៀតបានសម្រុកចូលទៅក្នុងរោងចក្រលួចយករបស់របរមានតម្លៃ តែត្រូវថៅកែជនជាតិ២នាក់ប្តីប្រពន្ធដឹងខ្លួន បានចេញមកប្រតាយប្រតប់គ្នាជាមួយពួកគេ ក៏ត្រូវពួកគេវាយរងរបួសធ្ងន់ទាំង២នាក់ប្តីប្រពន្ធ ចំណែកបុរសជនជាតិចិនម្នាក់ទៀតដែលស្នាក់នៅក្នុងរោងចក្រដែរ ភ័យពេកបានរត់ឡើងទៅពួនលើដំបូលរោងចក្រមិនមានរងរបួសទេ។
សមត្ថកិច្ចឲ្យដឹងថា បើតាមចម្លើយសារភាពរបស់ជនសង្ស័យថា ខ្លួនឈ្មោះ ចេក ចន្នី អាយុ២៩ឆ្នាំ មុខរបរត់ម៉ូតូឌុប ស្នាក់ម្តុំលូ៥ សង្កាត់ស្ទឹងមានជ័យ ខណ្ឌមានជ័យ ហើយកាលពីប៉ុន្មានថ្ងៃកន្លងមកនេះពួកគេបានមកលួចម្តងរួចមកហើយ ជាមួយបក្សពួកដែលធ្វើសន្តិសុខនៅរោងចក្រខាងលើនេះ ដោយលួចបានទូរស័ព្ទដៃ និងលេបថប១គ្រឿង។ ជនសង្ស័យបន្ដថា បន្ទាប់ពីលួចបាន ថៅកែបានដេញជនសង្ស័យជាសន្តិសុខចេញពីរោងចក្រឲ្យឈប់ធ្វើការ លុះដល់យប់កើតហេតុ ពួកគេមានគ្នា៦នាក់បានផឹកស៊ីស្រវឹង និងទៅជក់ថ្នាំញៀននៅបឹងឈូកមុខពេទ្យព្រះកុសុមៈ រួចហើយបានបបួលគ្នាមកចូលក្នុងរោងចក្រ ដើម្បីលួចលុយ និងសម្ភារៈម្តងទៀត។ ពួកគេជិះម៉ូតូ២គ្រឿងចូលទៅធ្វើសកម្មភាពលួចនៅក្នុងរោងចក្រ ស្រាប់តែ២នាក់ប្តីប្រពន្ធដឹងខ្លួន ធ្វើឲ្យមានការប្រតាយប្រតប់គ្នារងរបួសធ្ងន់២នាក់ប្តីប្រពន្ធ និងរូបគេរត់មិនរួចបានធ្លាក់ពីលើរបងបាក់ជើងរងរបួសធ្ងន់ ។
ក្រោយពេលកើតហេតុ ជនរងគ្រោះ២នាក់ប្តីប្រពន្ធ ត្រូវរថយន្តសង្គ្រោះដឹកយកទៅព្យាបាលនៅគ្លីនិកឯកជន។ ចំណែកជនសង្ស័យត្រូវដឹកយកទៅព្យាបាលនៅមន្ទីរពេទ្យព្រះកុសុមៈ ដោយឡែករបស់មានតម្លៃ និងលុយត្រូវបានបក្ខពួកជនសង្ស័យយកទៅអស់ហើយ។ ករណីនេះលោក យឹម សារ៉ាន់ អធិការនគរបាលខណ្ឌពោធិសែនជ័យ បានបញ្ជាក់ថា នៅពេលនេះកម្លាំងនគរបាលរបស់លោក បាននិងកំពុងបន្តតាមចាប់ខ្លួនបក្ខពួកទាំង៥នាក់ទៀតឲ្យខាងតែបានយកមកផ្តន្ទាទោស៕
http://ift.tt/2aPzrua
