លោក គុណ ញឹម មិមគួរដើរតាមគន្លង លោក ប៉ែន ស៊ីម៉ន បណ្តោយឲ្យលោក ខៀវ សំអាន មេគយច្រកព្រលានយន្តហោះអន្តរជាតិភ្នំពេញ បន្តទម្លាប់ប្រព្រឹត្តអំពើពុករលួយគ្មានការទប់ស្កាត់របៀបនេះទេ
ភ្នំពេញ៖ លោក ខៀវ សំអាន មេគយច្រកអាកាសយានដ្ឋានអន្តរជាតិភ្នំពេញ និងសហការី រងការចោទ ប្រកាន់ថា បានកោសរូសគាបយកប្រាក់តាមបែបអំពើពុករលួយ ពីក្រុមហ៊ុនវិនិយោគ អ្នកជំនួញ អាជីវករ តាមរយៈការរត់ការឯកសារ នាំទំនិញចេញ និងចូលដែលបានរងគ្រោះបង្ខំឲ្យបង់ប្រាក់ក្រៅផ្លូវការនោះរាប់សិបឆ្នាំមកហើយ ហើយដោយទ្រាំមិនបានពួកគេបានបើកកកាយលាតត្រដាងអំពើពុករលួយនោះ ជាបន្តបន្ទាប់ដើម្បីឲ្យក្រសួង និងស្ថាប័នពាក់ព័ន្ធចាត់វិធានការទប់ស្កាត់ជាបន្ទាន់។ អ្នករកស៊ីនាំចេញនាំចូលទំនិញតាមច្រកព្រលាន យន្តហោះអន្តរជាតិភ្នំពេញអំពាវនាវដល់ លោក គុណ ញឹម អគ្គនាយក នៃអគ្គនាយកដ្ឋានគយនិងរដ្ឋាករកម្ពុជា គួរចាត់វិធានការ ទប់ស្កាត់ ភាពមិនប្រករតី នៃការិយាល័យគយច្រកអាកាសយានដ្ឋានអន្តរជាតិភ្នំពេញ ក្រោមការដឹកនាំរបស់ លោក ខៀវ សំអាន ជាបន្ទាន់ព្រោះអំពើពុករលួយនេះកើតទ្បើងជាយូរមកហើយ។
ក្រុមអ្នករត់ការឯកសារប្រតិវេទគយនៅច្រកអាកាសយានដ្ឋានអន្តរជាតិ ភ្នំពេញ ដោយធុញទ្រាន់នឹងការកោសរូសនោះ បានបង្ហើបថា សម្រាប់សារនាំចេញទំនិញត្រូវបង់ឲ្យ អង្គភាពគយប្រចាំច្រកនេះ៤០ដុល្លារ ហើយឯកសារនាំចូលទំនិញត្រូវបង់ឲ្យសមត្ថកិច្ចគយសរុប៧៥ដុល្លារ ក្នុងមួយឯកសារ។ ក្រុមអ្នករត់ការបានបញ្ជាក់ថា ឯកសារនាំចេញត្រូវចំណាយទៅលើមន្ត្រីគយទទួលបន្ទុកផ្នែកខាងចុះលេខ៥ ដុល្លារ ផ្នែកត្រួតពិនិត្យ១០ដុល្លារ ផ្នែកបង្កាន់ដៃ១៥ដុល្លារ និងអនុប្រធាន៥ដុល្លារ ដោយលោក ខៀវ សំអាន ជាអ្នកបើកភ្លើងខៀវលើដំណើរការនោះ ហើយក្រៅពីនោះលោក ខៀវ សំអាន មិនបានឲ្យពួករត់ការរួចខ្លួនចំពោះការបង់ប្រាកជូនគាត់ដែរនោះទេ។ ដោយឡែកឯកសារនាំចូលទំនិញអ្នករត់ការត្រូវបង់ឲ្យមន្ត្រីគយផ្នែកចុះ លេខ៥ដុល្លារ ផ្នែកបង្កាន់ដៃ២០ដុល្លារ ផ្នែកប័ណ្ណបញ្ចេញទំនិញ៥ដុល្លារ ផ្នែកត្រួតពិនិត្យ១០ដុល្លារ អនុប្រធានផ្នែកត្រួតពិនិត្យ១៥ដុល្លារ និងកាត់ស្តុក២០ដុល្លារ ដែលក្នុងមួយៗថ្ងៃៗមានឯកសាររត់ការឆ្លងកាត់ប៊ុយរ៉ូមន្ត្រីគយមិនក្រោម១០០ច្បាប់នោះទេ។
អំពើពុករលួយរបស់សមត្ថកិច្ចគយច្រកអាកាសយានដ្ឋានអន្តរជាតិភ្នំពេញ ក្រោមការគ្រប់គ្រងរបស់លោក ខៀវ សំអាន ធ្វើឲ្យប៉ះពាល់យ៉ាងខ្លាំងដល់មុខរបរ និងសតិអារម្ភរបស់អ្នកវិនិយោគទុន អ្នកជំនួញនិងអាជីវករដែលនាំចេញនាំចូលទំនិញតាមច្រកនេះ។ ជាពិសេសប្រសិនបើអ្នករត់ការឯកសារក្រុមហ៊ុនមិនព្រមបង់លុយតាម ទាមទា ទេនោះ សមត្ថកិច្ចគយប្រាកដជារកលេសផ្សេងៗធ្វើឲ្យទំនិញមានការស្ទះដែលធ្វើឲ្យពួកគេជួបការខាតបង់ការផលិត ឬការផ្គត់ផ្គង់ឲ្យដៃគូ ជាមិនខាន ហេតុនេះហើយទើបអ្នករត់ការឯកសារក្រុមហ៊ុនត្រូវបង្ខំចិត្តបង់ប្រាក់ឲ្យ សមត្ថកិច្ចគយពុករលួយទាំងទើសទាល់ក្តៅក្រហាយ។ ករណីនេះអង្គភាពប្រឆាំងអំពើពុករលួយ ក៏គួរចាត់វិធានការតាមផ្លូវ ច្បាប់ដែលមានស្រាប់ជាបន្ទាន់ ចំពោះមន្ត្រីគយដែលរឹងរូសមិនសំអាតខ្លួនដែលនៅតែជាប់ពាក់ព័ន្ធប្រព្រឹត្តអំពើពុករលួយ ៕ ដោយ កញ្ញាសុភា
