ស្ត្រីម្នាក់មកពីហូកការចូលដេកជាមួយប្តី ព្រឹកឡើងដេកស្លាប់ម្នាក់ឯង ប្តីជិះម៉ូតូគេចខ្លួនតាំងពីម៉ោង៤ទៀបភ្លឺ
ខេត្តរតនគិរី៖ ស្រី្តម្នាក់ត្រឡប់មកពីហូកការវិញនាម៉ោង១១ និង០០នាទីយប់ចូលដេកក្នុងបន្ទប់ជាមួយប្តីដូចសព្វមួយដង លុះជិតថ្ងៃត្រង់ទៅហើយទើបផ្អើលឆោឡោដឹងថានាងស្លាប់ក្នុងបន្ទប់តែម្នាក់ឯង ដោយប្តីរបស់នាងបានចាកចេញពីបន្ទប់នោះស្ងាត់ៗតាំងពីព្រហៀមស្រាងៗម៉ោង៤ទាបភ្លឺ ថ្ងៃទី២៨ ខែមេសានេះ ដោយយកទូរស័ព្ទរបស់ប្រពន្ធ១គ្រឿងទៅជាមួយផង និងបានបិទទូរស័ព្ទ និងសូម្បីតែទូរស័ព្ទរបស់គេមាន៤ខ្សែក៏បានបិទទាំងអស់មិនអាចទាក់ទងបានទេ។ ករណីនេះក្រុមគ្រួសារ របស់ស្ត្រីរងគ្រោះបានដាក់ការសង្ស័យថាប្តីនាងជាអ្នកសម្លាប់។ ហេតុការណ៍នេះបានធ្វើឲ្យមានការភ្ញាក់ផ្អើលលាកពីវេលាម៉ោង ១១ និង៣០នាទី ព្រឹកថ្ងៃទី២៨ ខែមេសា ឆ្នាំ២០១៥ ស្ថិតក្នុងផ្ទះជនរងគ្រោះ ភូមិថ្មី សង្កាត់ឡាបានសៀក ក្រុងបានលុង ខេត្តរតនគិរី។
បើតាមប្រភពពីឪពុកស្ត្រីរងគ្រោះឈ្មោះ ឌុច អឿន អាយុ៥៧ឆ្នាំ មុខរបរលក់ត្រី បានឲ្យដឹងថា ស្ត្រីរងគ្រោះមានឈ្មោះ អឿន នាង អាយុ២១ឆ្នាំ សព្វថ្ងៃលក់មាសនៅក្នុងផ្សារបានលុង ប្តីមានឈ្មោះ វី ឆាយរ៉ាត អាយុ២៧ឆ្នាំ មុខរបរបើកឡានដឹកត្រីឲ្យម្តាយក្មេក និងកូនប្រុសម្នាក់ឈ្មោះ ឆៃ ម៉េងហៀងរស់នៅក្នុងលំនៅដ្ឋានជាមួយនឹងឪពុកម្តាយ និងបងប្អូនជាច្រើននាក់ទៀតតែមានបន្ទប់រៀងៗខ្លួនរស់នៅជាប់ៗគ្នា ។
ពូកគាត់បន្តថា កូនស្រីគាត់ និងកូនប្រសានេះឈ្លោះគ្នាក្នុង១សប្តាហ៍៥ថ្ងៃទៅហើយ មិនសូវត្រូវគ្នាទេ។ ហើយមុនពេលកើតហេតុនេះ វេលាម៉ោងប្រហែល៦ និង០០នាទីល្ងាច ថ្ងៃទី២៧ ខែមេសា ឆ្នាំ២០១៥នេះ ពីរនាក់ប្តីប្រពន្ធបានឈ្លោះប្រកែកគ្នាយ៉ាងខ្លាំង បន្ទាប់ពីឈ្លោះប្រកែកគ្នាមកស្ត្រីរងគ្រោះបានទៅហូបការគេនៅហាងតាទ្រី ក្នុងក្រុងបានលុងមានចម្ងាយពីផ្ទះប្រមាណ៥០០ម៉ែត្រ ដោយទៅជាមួយបងប្រុសបង្កើត បុរសជាប្តីនៅចាំផ្ទះ។ ស្ត្រីរងគ្រោះបានត្រឡប់មកពីហូបការម៉ោងប្រមាណ ១១ និង០០នាទីយប់ក៏ចូលទៅដេកជាមួយប្តីបាត់ទៅ។
បើតាមការឲ្យដឹងពីឪពុកខាងស្ត្រីរងគ្រោះបានបញ្ជាក់ថា៖ លុះម៉ោង៤ និង០០នាទីទាបភ្លឺ ក្រុមគ្រួសារ បាន ឃើញប្តីភ្ញាក់ពីដេកមុនប្រពន្ធ ហើយបានជិះម៉ូតូ ស្គូបពី ពណ៌ក្រហមចេញទៅបាត់ម្នាក់ឯងដោយយក ទូរស័ព្ទ របស់ ប្រពន្ធ១គ្រឿងទៅជាមួយផងដែរ។ ក្រុមគ្រួសារសព្វមិនបានដឹងថាកូនស្រីរបស់ខ្លួនស្លាប់នៅក្នុងបន្ទាប់នោះទេ។ តែដោយបាត់យូរពេកមិនឃើញចេញទៅលក់ដូរ ឬហូបបាយដូចសព្វមួយដង ទើបគាត់បាន បើកទ្វារបន្ទប់ស្ត្រីរងគ្រោះដែលដេកជាមួយប្តីនោះ ក៏បានប្រទះឃើញកូនស្រីរបស់គាត់បានស្លាប់បាត់ទៅហើយនៅម៉ោងខាងលើទើបមានការភ្ញាក់ផ្អើលកើតឡើង។
ភ្លាមនោះក្រុមគ្រួសារសព បានប្តឹងសមត្ថកិច្ចរឿងស្លាប់នេះ សមត្ថកិច្ចបានចុះមកពិនិត្យសាកសព ដោយមាន៖ លោក ជា សុភ័ក្ត ព្រះរាជអាជ្ញាអមសាលាដំបូងខេត្តរតនគិរី និងនគរបាលព្រហ្មទណ្ឌកម្រឹតធ្ងន់ និងនគរបាលការិយាល័យបច្ចេកទេស និងវិទ្យាសាស្ត្រនៃស្នងការនគរបាលខេត្ត រួមទាំងមន្ត្រីកងរាជអាវុធហត្ថខេត្តក្រុងផងដែរ។ លទ្ធផលក្រោយពីត្រួតពិនិត្យសាកសព សមត្ថកិច្ចបានឲ្យដឹងថា នៅលើខ្លួនសាកសពមានស្នាមជាំពេញភ្លៅ និងដងខ្លួន ជាមួយគ្នានេះសមត្ថកិច្ចមិនទាន់សន្និដ្ឋានថារឿងនេះជារឿងឃាតកម្មនោះទេ សង្ស័យថាស្ត្រីរងគ្រោះស្លាប់ដោយសារខ្យល់គ។
ដោយឡែកក្រុមគ្រួសារជនរងគ្រោះ ពួកគាត់បានដាក់ការសង្ស័យទៅលើបុរសជាប្តី ជាឃាតកសម្លាប់ប្រពន្ធ មូលហេតុប្តីបានជិះម៉ូតូគេចខ្លួនបាត់ចាប់តាំងពីម៉ោង ៤ និង០០នាទីទៀបភ្លឺ ហើយទូរស័ព្ទទាំងបួនខ្សែ ប្រើជាប្រចាំថ្ងៃរបស់ប្តីស្ត្រីរងគ្រោះបិទហៅមិនចូល៕ ដោយ លី វណ្ណៈ
http://ift.tt/1znezmk