ដំណាំកាហ្វេខេត្តមណ្ឌលគិរី កំពុងពង្រីការដាំដុះ និងចំការជាង៣០ហិកតា បានប្រមូលផល
ខេត្តមណ្ឌលគិរី៖ មណ្ឌលគិរី ជាខេត្តសម្បូរទៅដោយជួរភ្នំ ដីពណ៌ក្រហម និងអាកាសធាតុត្រជាក់ជាអំណោយផលល្អសម្រាប់ដំណាំកាហ្វេ ធ្វើឲ្យអ្នកដាំដំណាំកាហ្វេខេត្តមណ្ឌលគិរី ទទួលបានផលរហូតដល់២៥០០គីឡូក្រាម ក្នុង១ហិកតា ។
លោក ប៊ូ សុភាព ជាម្ចាស់ចំការកាហ្វេបានឲ្យដឹងថា ដំណាំកាហ្វេនៅខេត្តមណ្ឌលគិរីបច្ចុប្បន្នគឺមានទីផ្សារល្អ ណាស់ ដោយមានក្រុមហ៊ុនមកទទួលទិញដល់កន្លែងតែម្ដង ។ លោកបន្តថា ដីខេត្តមណ្ឌលគិរីគឺមានជីវជាតិល្អ នឹង អំណោយ ផលយ៉ាងខ្លាំងចំពោះដំណាំកាហ្វេ ធ្វើឲ្យដំណាំប្រភេទនេះលូតលាស់បានល្អមិនចាំបាច់ថែទាំដិតដល់ពេក ក៏អាច ទទួលបានទិន្នផលសមរម្យ ។
លោកបានប្រាប់ទៀតថា ដំណាំកាហ្វេគឺប្រមូលផលក្នុងអំឡុងខែ តុលា និង វិច្ឆកា ហើយកាហ្វេមានអាយុត្រឹម៣ឆ្នាំ គឺអាចប្រមូលផលបានហើយ ដោយក្នុង១ហិកតា គឺអាចទទួលបានទិន្នផលពី២តោន ទៅ២តោនកន្លះ សម្រាប់ការថែ ទាំមធ្យម ប៉ុន្តែបើសិនជាថែទាំបានដិតដល់ គឺផលអាចទទួលបានពី៤ទៅ៥តោន ។
លោក ប៊ូ សុភាព បានឲ្យដឹងទៀតថា ចំពោះទីផ្សារកាហ្វេនៅខេត្តមណ្ឌលគិរី ក្នុងពេលបច្ចុប្បន្ន សម្រាប់គ្រាប់កាហ្វេ ឆៅក្នុង១គីឡូក្រាម ជាមធ្យម គឺអាចលក់បានក្នុងតម្លៃ ២ដុល្លារ៣កាក់ ទៅ២ដុល្លារ៥កាក់ បើសម្រាប់គ្រាប់កាហ្វេលេខ១ គឺ មានតម្លៃ១០ទៅ១៥ដុល្លារ ក្នុង១គីឡូក្រាម ដោយឡែកសម្រាប់កាហ្វេដែលកែច្នៃរួចទៅជាម្សៅគឺមានតម្លៃ៦ដុល្លាក្នុង១គីឡូក្រាម ។
លោក សុង ឃាង ប្រធានមន្ទីរកសិកម្មខេត្តបានឲ្យដឹងថា ក្នុងខេត្តមណ្ឌលគិរីនាពេលបច្ចុប្បន្ន គឺមានដំណាំកាហ្វេ ប្រមាណ៤០ ទៅ៥០ហិកតា ហើយក្នុងនោះកសិករក្នុងក្រុងសែនមនោរម្យគឺបានបង្កបង្កើនផលដំណាំកាហ្វេច្រើនជាង គេ។ ហើយក្នុងឆ្នាំ២០១៥នេះ ខេត្តមណ្ឌលគិរីមានកាហ្វេដែលអាចប្រមូលផលបានប្រមាណជា៣០ហិកតា ៕ ដោយ ឦសាន២
http://ift.tt/1Q5MwvG
