ឧកញ៉ា អ៊ឹង ម៉េងតឹក ប្រមូលទិញឈើពីតំបន់ព្រៃឡង់យកមកលាក់ទុកនៅក្នុងចម្ការកៅស៊ូខាងក្រោយផ្ទះ មុននឹងដឹកយកទៅលក់នៅប្រទេសវៀតណាមតាមច្រកទន្លេចាមខេត្តត្បូងឃ្មុំ ត្រូវសមត្ថកិច្ចចម្រុះបង្ក្រាប
ខេត្ដក្រចេះ ៖ កាលពីវេលាម៉ោង១ និង៣០នាទីរសៀលថ្ងៃទី១៣ ខែឧសភា ឆ្នាំ២០១៥ គណៈបញ្ជាការឯកភាពស្រុក ព្រែកប្រសព្វ ខេត្ដក្រចេះ លោកអ៊ាន ណារម្យ បានដឹកនាំកម្លាំងចម្រុះរួមមាន នគរបាលស្រុកសហការជាមួយជំនាញ រដ្ឋបាលព្រៃឈើផ្នែកព្រែកប្រសព្វចុះ បង្ក្រាបការលាក់ទុកឈើប្រណីតខុសច្បាប់ ជាច្រើនម៉ែត្រគូបនៅចំណុចភូមិស្ទឹងទ្រ ឃុំតាម៉ៅ ស្រុកព្រែកប្រសព្វ ។
សមត្ថកិច្ចបានឲ្យដឹងថា ពាក់ព័ន្ធនឹង សកម្មភាពដឹកជញ្ជូនឈើមិនស្របច្បាប់នេះត្រូវបាន កម្លាំងស៊ើបអង្កេតទទួលព័ត៌មានថា ឈ្មួញបានដឹកចេញពីតំបន់ព្រៃឡង់ចំណុច ព្រំប្រទល់ខេត្ដកំពង់ធំ-ក្រចេះ ប្រភេទ ឈើសុក្រំលេខ១ ដែលពួកគេបម្រុងដឹក ចេញពីតំបន់នោះឆ្ពោះទៅកាន់ខេត្ដត្បូង ឃ្មុំដើម្បីឆ្លងទៅប្រទេសវៀតណាមច្រក ទន្លេចាម ។
ប្រភពគួរឲ្យជឿទុកចិត្ដបង្ហើបថា ឈើទាំងអស់នេះជារបស់ឧកញ៉ា អ៊ឹង ម៉េងតឹក សរុបចំនួន៥៩ដុំ ស្មើនឹងជិត១០ម៉ែត្រ គូប ត្រូវបានសមត្ថកិច្ចរកឃើញកាលពីរសៀលថ្ងៃទី១៣នេះ នៅក្នុងចម្ការកៅស៊ូខាងក្រោយផ្ទះឧកញ៉ារូបនេះ បន្ទាប់ពី ប្រើប្រាស់ពេលវេលា១ថ្ងៃពេញដើម្បី តាមដានពីទីតាំងលាក់ឈើទាំងនេះ ។
លោកអ៊ាន ណារម្យ អភិបាលនៃគណៈ អភិបាលស្រុកព្រែកប្រសព្វបានឲ្យដឹងថា បន្ទាប់ពីធ្វើការបង្ក្រាប សមត្ថកិច្ចបាន រៀបចំឯកសារធ្វើកំណត់ហេតុ និងប្រគល់វត្ថុតាងទាំងនេះទៅឲ្យខាងផ្នែករដ្ឋបាល ព្រៃឈើព្រែកប្រសព្វ ចាត់ការបន្ដតាម នីតិវិធីព្រៃឈើ ។
គួររំលឹកថា កន្លងទៅក្នុងថ្ងៃចូលឆ្នាំ ខ្មែរប្រពៃណីជាតិ រថយន្ដដឹកឈើយីឌុប ចំនួន២គ្រឿងរបស់ឧកញ៉ាអ៊ឹង ម៉េងតឹក ត្រូវបានបង្ក្រាប ។ ក្រោយមកគាត់ក៏ ផ្អាកការរកស៊ីឈើខុសច្បាប់មួយរយៈ ទើបលេចសារជាថ្មី ចេញមុខប្រមូលទិញ ឈើ និងដឹកជញ្ជូនចេញពីតំបន់ព្រៃឡង់ ចំណុចរវាងព្រំប្រទល់ខេត្ដកំពង់ធំ-ក្រចេះ ប្រឈមនឹងការបង្ក្រាបពីសមត្ថកិច្ចជា លើកទី២ ។
ប្រភពខ្លះអះអាងថា ការបង្ក្រាបកើតឡើងនេះដោយសារ បញ្ហាការរកស៊ីប៉ែងជើងក្ដិចត្រួយ ឬភ្នំមួយ មិនអាចមានខ្លាពីរ ព្រោះមានឧកញ៉ា ផ្សេងទៀតដូចជា ឧកញ៉ា ឆាយ ជ្រាយ កំពុងចេញមុខរកស៊ីដឹកឈើ នៅតំបន់នោះ ចាត់ចែងសេវាជូនសមត្ថកិច្ចជំនាញពាក់ព័ន្ធអស់ហើយ ទើបក្ដៅ ស្លឹកត្រចៀករាយការណ៍ឲ្យសមត្ថកិច្ចចាប់ ឈើឧកញ៉ាអ៊ឹង ម៉េងតឹក ដែលហ៊ានរកប្រជែង ៕ ផ្កាច័ន្ទ
http://ift.tt/1Jtlug4
