តុលាការឃុំខ្លួនស្រីមេម៉ាយ ធ្វើទារុណកម្ម លើកូនប្រុសខ្លួនឯង (មតិមួយចំនួនចង់ឲ្យអនុវត្តត្រឹមអប់រំសិន)
ភ្នំពេញ ៖ ស្ត្រីមេម៉ាយម្នាក់ដែលវាយ និងធ្វើទារុណកម្មទៅលើកូនប្រុសរបស់ខ្លួនឯង ដោយយកខ្សែចងដៃ ចងជើងព្រោះតែរឹងរូស និងប្រដៅមិនស្តាប់នោះ ឥឡូវត្រូវបានព្រះរាជអាជ្ញាសម្រេចធ្វើការចោទប្រកាន់ និងចៅក្រមស៊ើបបង្គាប់ឲ្យឃុំខ្លួនជាបណ្តោះអាសន្ន បន្ទាប់ពីជីតារបស់ក្មេងប្រុសបានប្តឹងទៅសមត្ថកិច្ចឲ្យធ្វើការឃាត់ខ្លួនរួចមក ។ ហើយនៅរសៀលថ្ងៃទី០៨ ខែឧសភា ឆ្នាំ២០១៥ បន្ទាប់ពីសមត្ថកិច្ច កសាងសំណុំរឿង បញ្ជូនទៅតុលាការ ក្រោយពីធ្វើការសាកសួរហើយ លោកព្រះរាជអាជ្ញារង ទេព មុនិន្ទ សម្រេចធ្វើ ការចោទប្រកាន់ស្ត្រីខាងលើនេះ ពីបទ ហិង្សាដោយចេតនា មានស្ថានទម្ងន់ទោសតាមមាត្រាទី ២១៧ នៃក្រមព្រហ្មទណ្ឌ ហើយលោកចៅក្របស៊ើបសួរ ឆែរ វិវឌ្ឍនៈ បានសម្រេចចេញដីកាឃុំខ្លួនស្ត្រីជាម្តាយជាបណ្តោះអាសន្ន ។
សូមរំលឹកថា កាលពីយប់ថ្ងៃទី០៧ ខែឧសភា ឆ្នាំ២០១៥ កន្លងទៅនេះ សមត្ថកិច្ចបានចុះទៅឃាត់ខ្លួនស្ត្រីមេម៉ាយ ម្នាក់ ឈ្មោះ សុខ វណ្ណា អាយុ ៣៧ឆ្នាំ មានមុខរបរ នៅផ្ទះ ស្នាក់នៅផ្ទះគ្មានលេខ ក្នុងភូមិដើមមៀន សង្កាត់ដើមមៀន ក្រុង តាខ្មៅ ខេត្តកណ្តាល ដោយយោងតាមពាក្យបណ្តឹងរបស់បុរសដែលត្រូវជាឪពុករបស់ស្ត្រីខាងលើ ដែលបានប្តឹងចោទ ប្រកាន់កូនស្រីរបស់ខ្លួន ពីបទ វាយធ្វើទារុណកម្មទៅលើចៅប្រុស ដោយធ្វើការហាមឃាត់ មិនស្តាប់ ។ ខណៈសមត្ថកិច្ចចុះទៅដល់ បានឃើញកេ្មងប្រុសម្នាក់អាយុ ៦ឆ្នាំ ត្រូវបានម្តាយវាយធ្វើទារុណកម្មដោយ យកទំពក់សម្រាប់ហាលខោអាវ មកចងជើង និងចងដៃ ដេកនៅលើកម្រាលឥដ្ឋ ទើបសមត្ថកិច្ច សម្រេចធ្វើការឃាត់ខ្លួនស្ត្រីរូបនេះ នាំយកទៅកាន់អធិការដើម្បីកសាងសំណុំរឿងបញ្ជូនទៅតុលាការ ។
ខណៈសមត្ថកិច្ចបញ្ជូនស្ត្រីខាងលើនេះ ទៅតុលាការកូនប្រុសដែលទើបមានអាយុ ៦ឆ្នាំ ក៏បាន ស្រែកយំ និងរត់តាមម្តាយផងដែរ ចំណែកឪពុករបស់ស្ត្រីត្រូវឃាត់ខ្លួនហាក់មានអារម្មណ៍ខកចិត្ត ដោយមិននឹកស្មានថាសមត្ថកិច្ចអនុវត្តធម៌ក្តៅឈានដល់ឃុំខ្លួននោះ ដែលគាត់ចង់ត្រឹមតែឲ្យសមត្ថកិច្ចណែនាំអប់រំតែប៉ុណ្ណោះ។ ក្រៅពីក្រុមគ្រួសារស្ត្រី ដែលត្រូវតុលាការឃុំខ្លួននោះ មតិទូទៅត្រូវ បានលើកឡើងស្រដៀងៗគ្នាចង់ឲ្យសមត្ថកិច្ច និងតុលាការអនុវត្តត្រឹមអប់រំ និងធ្វើកិច្ចសន្យាឲ្យបញ្ឈប់ប្រព្រឹត្តហិង្សា និងធ្វើទារុណកម្មលើកូននោះវាគ្រប់គ្រាន់ទៅហើយ៕ គិរី
http://ift.tt/1E0zjeE