លោក យឹម វណ្ណៈ មេគយច្រកដូង៧ដើម ទើបកាន់តំណែងថ្មីថ្មោងបន្តពីលោក នូ ស៊ីថា បានប្រើជំនាញរាប់ក្បាលឡានដឹកឈើ និងជួយសម្រួលទំនិញគេចពន្ធ កើបលុយស្រង់ដើម
ខេត្តត្បូងឃ្មុំ ៖ លោក យឹម វណ្ណៈ ប្រធានស្តីទី ការិយាល័យគយ និងរដ្ឋាករ ច្រកដូង៧ដើម នៅឃុំដារ ស្រុកមេមត់ ខេត្តត្បូងឃ្មុំ ដែលទើបតែទទួលបានការតែងតាំងជំនួសលោក នូ ស៊ីថា ហើយលោក នូ ស៊ីថា បានជ្រែទៅយកតំណែងជាប្រធានសាខាគយ និងរដ្ឋាករខេត្តត្បូងឃ្មុំ។ មានការកត់សំគាល់ថា សព្វថ្ងៃនេះលោក យឹម វណ្ណៈ កំពុងតែដើរតាមគន្លងលោក នូ ស៊ីថា ធ្វើឲ្យគេមើលឃើញក្រុមឈ្មួញធំៗ ដែលរកស៊ីនាំចូល ទំនិញគេចពន្ធ និងអ្នករកស៊ី ដឹកជញ្ជូនឈើខុសច្បាប់ ចេញទៅប្រទេសវៀតណាម តាមច្រកដូង៧ដើម នៅតែមានសកម្មភាពគគ្រឹកគគ្រេង ដែលសុទ្ធតែជាម៉ូយចាស់ៗរបស់លោក នូ ស៊ីថា ហើយបានក្លាយជាប្រភពចំណូលធ្វើលោក យឹម វណ្ណៈ សប្បាយប្រមូលយកលុយច្រកហោប៉ៅ ធ្វើមានធ្វើបានផ្ទាល់ខ្លួន។
សេចក្តីរាយការណ៍ឲ្យដឹងថា សព្វថ្ងៃនៅច្រកដូង ៧ដើម នៅតែបន្តអនុវត្តន៍រូបមន្ត ពុករលួយបន្តពីលោក នូ ស៊ីថា ព្រោះមានទំនិញគេចពន្ធ ជាច្រើនប្រភេទ ដែលឈ្មួញធំៗនាំឆ្លងកាត់ គឺជំនាញគយ របស់លោក យឹម វណ្ណៈ បានឃុបឃិតជាមួយឈ្មួញ បង់ពន្ធរបៀបជាទំនិញក្លែងភេទ និងបង់ពន្ធមិនគ្រប់ជាដើម។ ពេលខ្លះឈ្មួញ ដឹកសុទ្ធតែថ្នាំពេទ្យ គ្រឿងសំណង់ និងទំនិញមានតម្លៃ តែគេបង់ពន្ធ ជារបៀបទំនិញចាប់ហួយ ឬតុ កៅអី ជ័រ ទៅវិញ ហើយការបង់ពន្ធ ក្លែងភេទទំនិញនេះ ក៏គេមិនបង់ទាំងស្រុង មិនគ្រប់ចំនួននោះដែរ យ៉ាងច្រើនគេបង់ ត្រឹមតែ ៣០ទៅ៤០ ភាគរយប៉ុណ្ណោះ ដែលធ្វើឲ្យខាតបង់ ចំណូលថវិកាជាតិ យ៉ាងច្រើនសម្បើម ក្នុងមួយខែៗ ប៉ុន្តែថវិកានោះបានធ្លាក់ចូលទៅហោប៉ៅលោក យឹម វណ្ណៈ យ៉ាងត្រជាក់ចិត្ត។
សេចក្តីរាយការណ៍បានឲ្យដឹងទៀតថា ទំនិញដែលឈ្មួញធំៗ នាំចូលតាមច្រកដូង ៧ដើមនេះ ដឹកតាមរថយន្តយីឌុប ផ្ទុកលើសទម្ងន់ សុទ្ធតែថ្នាំពេទ្យ និងគ្រឿងអេឡិចត្រូនិច បែរជាមន្ត្រីគយ ជួយសម្រួលក្លែងឯកសារ ឲ្យបង់ពន្ធជារបៀប ទំនិញចាប់ហួយ ប្រើប្រាស់ប្រចាំថ្ងៃទៅវិញ ដែលល្បិចបែបនេះ គេធ្វើឲ្យស៊ីសង្វាក់គ្នាថា សព្វថ្ងៃទំនិញ ដែលហូរចូល និងរដ្ឋយកពន្ធ ក្នុងការនាំចូល មានតែរបស់របរ ទំនិញប្រើប្រាស់ ប្រចាំថ្ងៃតែប៉ុណ្ណោះ ហើយមេឈ្មួញសុខចិត្ត បង្វែរការគេចមិនបង់ពន្ធ យកទៅបែងចែក ជារបបប្រចាំខែជូនលោក យឹម វណ្ណៈ ដោយមិនហ៊ានរំលងម្តងណាឡើយ។
ដោយឡែក ប្រជាពលរដ្ឋ ដែលដឹកផលកសិកម្ម ទៅលក់នៅប្រទេសវៀតណាម បានឲ្យដឹងថា ពួកគាត់ដឹកដំឡូងមី ពោត គ្រាប់ស្វាយចន្ទី ក្រៅតែនាំចេញតាមច្រកដូង គឺបានចេញតាមច្រករបៀងបុសតាកុក ដែលនៅចម្ងាយ៣គីឡូម៉ែត្រពីច្រកដូង ស្ថិតក្រោមការគ្រប់គ្រងរបស់សមត្ថកិច្ចច្រកដូងតែមួយ ពួកគាត់ បានប្រាក់ចំណេញ តិចតួចប៉ុណ្ណោះ ត្រូវកូនចៅរបស់លោក យឹម វណ្ណៈ គាបយកលុយ ហើយប្រឈមនឹងការស្តីបន្ទោស មើលងាយមើលថោក ដោយសម្តីអសុរោះ ប៉ុន្តែសម្រាប់ក្រុមឈ្មួញ រកស៊ីដឹកឈើខុសច្បាប់ ឆ្លងទៅវៀតណាម ដូចជាឈ្មោះ សាន ចយ ឧកញ៉ា លឹម ប៊ុណ្ណា ហៅខ្នា ជាដើម គេមិនដែលឃើញ កូនចៅរបស់លោក យឹម វណ្ណៈ បញ្ចេញឫកពាឬប្រើសម្តីធំៗ ទៅលើក្រុមឈ្មួញទាំងនោះ ម្តងណាឡើយ មានតែស្រក់ទឹកមាត់ ហើយឃុបឃិតគ្នា ជាមួយអ្នករកស៊ីល្មើសច្បាប់ ដើម្បីបានលុយច្រកហោប៉ៅ ដោយមិនខ្វល់ពីការកែទម្រង់ស្អីនោះទេ។
មានការកត់សម្គាល់ផងដែរថា ទំនិញភាគច្រើន ដែលនាំចូលពីវៀតណាម មួយចំនួនជាផលិតផលមកពីស្រុកចិន ឬទំនិញខុសច្បាប់ ដូចជាថ្នាំពេទ្យ គ្មានការចុះបញ្ជីការត្រឹមត្រូវ គ្រឿងអេឡិចត្រូនិច ទំនិញចាប់ ហួយ តុ កៅអីជ័រ ឈ្មួញបង់ពន្ធពិតប្រាកដ យ៉ាងច្រើន ៤០ភាគរយ ប៉ុណ្ណោះ ដោយមានជំនាញគយ ជាអ្នកជួយសម្របសម្រួល។ ទំនិញគេចពន្ធទាំងនេះ មិនអាចគេចផុត ពីក្រសែភ្នែកសមត្ថកិច្ចគយ បានទេ តែលោក យឹម វណ្ណៈ បានឆ្នៃធ្វើជាឆ្នាំងបាយ ជាប្រយោជន៍ ផ្ទាល់ខ្លួន និងរៀបបញ្ចប់ខែជូនថ្នាក់លើឆ្វេងស្តាំ សម្រាប់ការពារតួនាទីខ្លាញ់ របស់ខ្លួនបានយ៉ាងប្រសិទ្ធភាព ដែលរូបមន្តនេះលោក នូ ស៊ីថា បានអនុវត្តបានជោគជ័យរួចមកហើយ ៕ ផ្កាច័ន្ទ
http://ift.tt/1IPA5i4
