ស្ទាវពីរក្រុមពួនស្ទាក់ប្រយុទ្ធគ្នា របួសធ្ងន់ស្រាលមួយចំនួន ចាប់បាន១នាក់ រត់ចោលផ្ទះ៦នាក់
ខេត្តព្រះសីហនុ៖ ស្ទាវ១ក្រុមមានបក្ខពួក៧នាក់បានព្រួតគ្នាប្រើដំបង និងកាំបិតស្ទាក់វាយ និងកាប់ ស្ទាវដៃទទេ១ក្រុមមានគ្នា៦នាក់ បណ្តាលឲ្យស្ទាវដៃទទេរបួសធ្ងន់១នាក់។ ហើយក្រុមស្ទាវពួនស្ទាក់វាយកាប់គេនោះត្រូវសមត្ថកិច្ចកងរាជអាវុធហត្ថចាប់បាន១នាក់ កាលពីវេលាម៉ោង៥ល្ងាច ថ្ងៃទី០៥ ខែឧសភា ឆ្នាំ២០១៥ នៅចំណុចគីឡូម៉ែត្រលេខ៦ ស្ថិតនៅផ្លូវម៉ាឡេ ក្នុងភូមិវាល ឃុំកំពង់សិលា ស្រុកកំពង់សិលា ខេត្តព្រះសីហនុ ហើយត្រូវសមត្ថកិច្ចកងរាជអាវុធហត្ថខេត្តបញ្ជូនខ្លួនទៅកាន់សាលាដំបូងហើយកាលពីរសៀលថ្ងៃទី៧ឧសភានេះ ក្នុងបទប្រព្រឹត្តអំពើហិង្សាដោយ មានស្ថានទម្ងន់ទោស។
លោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថ ខេត្តព្រះសីហនុ បាន អោយដឹងថា មុនពេលកើតហេតុគេបានឃើញក្រុមក្មេងទំនើងពីរក្រុម មួយក្រុមមានគ្នា០៦នាក់មានដៃទទេ និងមួយក្រុមទៀតមានគ្មា ០៧នាក់ ប្រដាប់ដោយដំបង កាំបិត និងកាំភ្លើងកែច្នៃ បានពួនស្ទាក់ធ្វើសកម្មភាពកាប់ចាក់វាយ ទៅលើក្រុមទី១ បណ្តាលឲ្យមានអ្នករងរបួសធ្ងន់ធ្ងរ និងស្រាល។
លោកបន្តថា យុវជនម្នាក់ឈ្មោះ សុខ តួ ភេទប្រុស អាយុ២១ឆ្នាំ បានរងរបួសយ៉ាងធ្ងន់ធ្ងរ និងបញ្ជូនទៅព្យាបាល ។ ដោយឡែកក្រុមក្មេងទំនើងបង្កហេតុ ត្រូវបានកម្លាំងជំនាញបានដេញប្រថាប់ចាប់ប្រភីងបានចំនួន០១នាក់ មានឈ្មោះផាន់ សួយ អាយុ ២៧ឆ្នាំ មានទីលំនៅ ភូមិវាល ឃុំកំពង់សិលា ស្រុកកំពង់សិលា និងបក្ខពួកចំនួន ០៦នាក់ ផ្សេងទៀតបានរត់ចោលផ្ទះគេចខ្លួនបាត់។ ទោះយ៉ាងណាកម្លាំងកងរាជកំពុងបន្តស្វែងរកចាប់ខ្លួន៕ សមុទ្រខៀវ
http://ift.tt/1zRozVk