តូចចិត្តខឹងនឹងប្រពន្ធទៅតាមហៅដល់វង់ផឹកស៊ីឲ្យមកផ្ទះ បានប្រហារជីវិតខ្លួនឯងដោយចងកនៅមែកឈើក្រោផ្ទះដើម្បីកុំឲ្យប្រពន្ធរំខានទៀត
ខេត្តរតនគិរី៖ លោកប្តីចិត្តស្រាលគិតខ្លីម្នាក់ បានសម្រេចចិត្តធ្វើអត្តឃាត ប្រហារជីវិតខ្លួនឯងគ្មាន ស្រណោះស្តាយអ្វីបន្តិចឡើយ ដោយសារតែខ្លួនគេកំពុងផឹកស៊ី ជាមួយមិត្តភក្តិសប្បាយស្ទើរលេចថ្លើម ស្រាប់តែឃើញប្រពន្ធបីកូនទៅហៅមកផ្ទះ ទំនងគិតថារំខាន ហើយផ្ទុះកំហឹងមួរម៉ៅក្តៅក្រហាយ ឈឺចិត្តឈឺជីវា ក៏ទាញយកខ្សែហ្វ្រាំងប្រភេទខ្សែអន្ទាក់ ដាក់សត្វព្រៃ មកមកចងកប្រហារជីវិតខ្លួនឯងស្លាប់ ស្លាប់តាមបំណងដូចខ្លួនគេចង់។ ទុកឲ្យប្រពន្ធកូនរស់នៅរងទុក្ខវេទនា និងបាត់បង់ភាពកក់ក្តៅ និងជំហរមេគ្រូសារ។ហេតុការណ៍បុរសស្រឡាញ់ការជួបជុំផឹកស៊ីជាងជីវិតនេះបានធ្វើអត្តឃាតដោយចងកខ្លួនឯងនោះ កើតឡើងកាលពីវេលាម៉ោង១ និង៣០ នាទីយប់ថ្ងៃទី១៥ ខែឧសភា ឆ្នាំ២០១៥ នៅក្នុងភូមិចាយ ឃុំញ៉ាង ស្រុកអណ្តូងមាស ខេត្តរតនគិរី។
លោក ផាត សុវ៉ាត អធិការរងនគរបាលស្រុកអណ្តូងមាសបានឲ្យដឹងថា៖ បុរសដែលធ្វើអត្តឃាត ចងកសម្លាប់ខ្លួនឯងនោះឈ្មោះ រម៉ាម ពិល ភេទប្រុស អាយុ២៩ឆ្នាំ ជនជាតិកាចក់ រស់នៅក្នុងភូមិឃុំកើតហេតុខាងលើ និងមានប្រពន្ធកូន(មិនស្គាល់អត្តសញ្ញាណ)។ កាលពីព្រឹកថ្ងៃទី១៤ ខែឧសភា ឆ្នាំ២០១៥ ញាតិមិត្ត ក្នុងភូមិក្បែរខាងជាមួយគ្នា បានតសំយ៉ាបផ្ទះ ហើយក៏មានកម្មវិធីផឹកស៊ីតាមទំនៀមទម្លាប់របស់បងប្អូនជនជាតិដើមដោយម្នាក់សប្បាយភ្លេចប្រពន្ធកូនផ្ទះសម្បែង លែងខ្វល់បាយទឹកតាំងពីព្រឹករហូតដល់ល្ងាច។
លោកអធិការរងបន្តទៀតថា៖ ការជួបជុំស៊ីផឹកសប្បាយនោះបានចាប់ផ្តើមតាំងពីព្រឹករហូតទល់ល្ងាច(ពេញមួយថ្ងៃតែម្តង) ចំណែកជនរងគ្រោះបានផឹកស្រាស្រវឹងជោគជាំយ៉ាងខ្លាំងដោយសារទឹកប្តូរនិស្ស័យ លែងស្គាល់ខុសត្រូវ ខណៈប្រពន្ធបីកូនតូចទៅហៅលោកប្តី អោយមកផ្ទះវិញ ខ្លាចស្រវឹង កើតជាជំងឺក៏កើតជាខឹងឆេវឆាវ ចេញយក្សកំណាចមួយរំពេចដោយរកសម្លាប់កូនចោលថែមទៀត។ ប្រពន្ធឃើញសភាពបែបនេះក៏បណ្តោយតាមចិត្តគាត់ទៅលែងរវីរវល់ជាមួយលោកម្ចាស់ប្តីដែលត្រូវការផឹកអាកាសាហាវបន្ថែមព្រោះមិនទាន់ឆ្អែត។ លុះដល់វេលាយប់ម៉ោង១និង៣០នាទីត្រូវនិងថ្ងៃទី១៥ ខែឧសភា ឆ្នាំ២០១៥ ត្រូវបានអ្នកជិតខាងផ្ទះប្រទះឃើញបុរសខ្លាំងខាងផឹកស្រាមិនស្តាប់ប្រពន្ធនោះចងកនៅនឹងមែកឈើខាងក្រោយផ្ទះ ដែលមានចំងាយប្រមាណ២ម៉ែត្រប៉ុណ្ណោះ ពី ផ្ទះរបស់ខ្លួន ក៏មានការឆោឡោភ្ញាក់ផ្អើលឡើងទឹលទាំងយប់។
លុះព្រឹកឡើងថ្ងៃទី១៥ ខែឧសភា ឆ្នាំ២០១៥ ក្រុមគ្រួសារ និងប្រជាពលរដ្ឋបានរាយការណ៍ ទៅសមត្ថ កិច្ច ព្រមទាំងអាជ្ញាធរមូលដ្ឋានហើយ បានចុះទៅដល់កន្លែងកើតហេតុ រួចត្រួតពិនិត្យ និងធ្វើកោសល្យវិច្ច័យសាកសពបុរស ហើយបានកំណត់ថា សពពិតជាធ្វើអត្តឃាតខ្លួនឯងពិតប្រាកដមែន មិនមែនជាករណីឃាតកម្មស្អីនោះឡើយ។ សាកសពត្រូវបានសមត្ថកិច្ចប្រគល់ឲ្យក្រុមគ្រួសារធ្វើបុណ្យតាមប្រពៃណី៕ ដោយ លី វណ្ណៈ
http://ift.tt/1L1k1vz
