យុវជន១ក្រុមសម្លុតពលករ២នាក់ប្តីប្រពន្ធឆ្លងដែនពីប្រទេសថៃយកលុយ ត្រូវ PM ចាប់ខ្លួនបាន១នាក់ រត់គេចខ្លួន៣នាក់
ខេត្តបន្ទាយមានជ័យ៖ លោកឧត្តមសេនីយ៍ត្រី ឱ បូរិន្ទ មេបញ្ជាការកងរាជអាវុធហត្ថខេត្តបន្ទាយមានជ័យ បានប្រាប់អោយ ដឹងនៅព្រឹកថ្ងៃទី១៥ ខែឧសភា ឆ្នាំ២០១៥ នេះថា ពាក្យបណ្ដឹងចុះថ្ងៃទី១៣ ខែ ឧសភា ឆ្នាំ២០១៥ របស់ជនរងគ្រោះឈ្មោះ ផែន ចន្ធី ភេទ ប្រុស អាយុ ១៩ ឆ្នាំ និងប្រពន្ធឈ្មោះ ឌី ចន្នី អាយុ១៨ ឆ្នាំមានទីលំនៅ ភូមិ ព្រៃព្រំពីរ ឃុំ របោសមង្គល ស្រុក មោង ឫស្សី ខេត្តបាត់ដំបង កាលនៅវេលាម៉ោង៥ល្ងាចថ្ងៃទីខែឆ្នាំដដែរលនោះ ជនរងគ្រោះ បានធ្វើដំណើរត្រឡប់មកពីប្រទេសថៃ ពេលមកដល់ផ្សារលុងក្លឿរ ប្រទេសថៃបានជួបក្រុមជនសង្ស័យមានគ្នា៦នាក់ បានមកនិយាយបញ្ចុះបញ្ចូលថា ពួកគេ(ជន សង្ស័យ)ជូនចេញពីផ្សាររោងក្លឿរ មកកាន់ទឹកដីកម្ពុជាវិញ ដោយយកថ្លៃជូនម្នាក់៤៥០បាត។ រួចហើយក្រុមជនសង្ស័យ បាន យកកាបូបខោអាវ របស់ជនរងគ្រោះដើរចេញមក ។
លោកមេបញ្ជាការកងរាជអាវុធហត្ថបន្តថា បន្ទាប់មកជនរងគ្រោះក៏បានចេញមកជាមួយដែរ។ លុះជិតឆ្លងចូលដល់ដីខ្មែរ ជនរងគ្រោះបានបង់ប្រាក់អោយទៅក្រុមជនសង្ស័យចំនួន៩០០បាត តាមការព្រមព្រៀង រួចហើយក្រុមជនសង្ស័យបាននាំគ្នាចេញទៅបាត់អស់ នៅសល់ជនសង្ស័យម្នាក់ ឈ្មោះវឿន សី បានទាមទារអោយជនរងគ្រោះបង់ប្រាក់បន្ថែមចំនួន៥០០បាត ថែទៀត ដោយស្ថានភាពមិនល្អក៏សម្រេចចិត្តប្រគល់លុយបន្ថែម លុះមកដល់ទឹកដីកម្ពុជា ក៏រត់មករកសមត្ថកិច្ចកងរាជអាវុធហត្ថជួយអន្តរាគមន៍ ។
លោកបន្ថែមថា ក្រោយពីបានទទួលពាក្យបណ្ដឹងរួច កម្លាំងអាវុធហត្ថមូលដ្ឋានក្រុងប៉ោយប៉ែត ធ្វើអន្តរាគមន៍ភ្លាមៗ ដឹកនាំដោយលោកជា ដា មេបញ្ជាការមូលដ្ឋាន កងរាជអាវុធហត្ថក្រុងប៉ោយប៉ែតធ្វើស្រាវជ្រាវរហូតឃាត់ខ្លួនបានជនសង្ស័យម្នាក់ឈ្មោះ វឿន សី ភេទប្រុស អាយុ១៩ឆ្នាំ នៅវេលាម៉ោង៧ និង១៥នាទីយប់ ថ្ងៃខែដដែល មកកាន់មូលដ្ឋាន កងរាជអាវុធហត្ថក្រុងដើម្បីធ្វើការសាកសួរ។
ក្រោយពីសមត្ថកិច្ចធ្វើការសាកសួរជនសង្ស័យឈ្មោះ វឿន សី បានឆ្លើយសារភាពថាពួកគេពិតជាបានធ្វើសកម្មភាពជំរិតទារប្រាក់ពីជនរងគ្រោះពិតប្រាកដមែន ដោយមានបក្សពួកចំនួន៤នាក់គឺ ទី១ឈ្មោះ ហ៊ួរ ភេទ ប្រុស អាយុ ១៨ឆ្នាំ ,ទី២ ឈ្មោះ អូរ លាង ភេទប្រុស អាយុ៣១ឆ្នាំ ,ទី៣ឈ្មោះ សុខ ជា ភេទប្រុស អាយុ២៥ឆ្នាំ ជនសង្ស័យ៣នាក់នេះកំពុងរត់គេចខ្លួន និងទី៤ឈ្មោះ វឿន សី ភេទប្រុស អាយុ១៩ឆ្នាំ សមត្ថកិច្ចឃាត់ខ្លួនបានសម្រេច រីឯបក្ខពួករបស់ខ្លួនគឺរស់នៅក្នុងក្រុងប៉ោយប៉ែត។ បច្ចុប្បន្ន សមត្ថកិច្ចកំពុងកសាងសំណុំរឿងបញ្ជូនទៅសាលាដំបូងខេត្តចាត់ការតាមនិតិវិធីច្បាប់ ចំណែកបក្ខពួក៣នាក់ទៀតកងរាជអាវុធហត្ថក្រុងប៉ោយប៉ែតកំពុងស្រាវជ្រាវចាប់ខ្លួនបន្ត៕ ដោយ វ៉ាន់ វត្ថា
http://ift.tt/1B5UyvO
