អាមេរិកនឹងបញ្ចេញរថក្រោះ២៥០គ្រឿង ដើម្បីឆ្លើយតបការគំរាមរបស់រុស្ស៊ី
មហាអំណាចយោធាសហរដ្ឋអាមេរិក នឹងបញ្ជូនរថក្រោះ ២៥០គ្រឿង កាំភ្លងធំ និងសព្វាវុធធ្វើសង្គ្រាមមួយចំនួនទៀត ទៅកាន់ប្រទេសចំនួន៧ នៅអឺរ៉ុប ដើម្បីប្រឆាំងទៅនឹងការគំរាមកំហែងឈ្លានពានរបស់រុស្ស៊ី។
រថក្រោះរបស់អាមេរិក
លេខាធិការក្រសួងការពារជាតិសហរដ្ឋអាមេរិក លោក Ash Carter បាននិយាយថា ប្រទេសអេស្តូនី លីទុយអានី ឡាតវី រ៉ូម៉ានី ប៊ុលហ្គារី និងប្រទេសប៉ូឡូញ គឺជាកន្លែងផ្ទុកសព្វាវុធធុនធ្ងន់ទាំងនេះ។
គោលដៅចម្បងនៃការបញ្ចេញសាច់ដុំរបស់សហរដ្ឋអាមេរិក គឺដើម្បីផ្ដល់ទំនុកចិត្តដល់បណ្ដាប្រទេសនៅក្នុងសម្ព័ន្ធ NATO ដែលកំពុងរងការគំរាមកំហែងពីសកម្មភាពរុស្សីក្នុងប្រទេសអ៊ុយក្រែន។
”ជាបណ្ដោះអាសន្ន យើងនឹងដាក់ពង្រាយសព្វាវុធប្រយុទ្ធមួយកងពល និងសម្ភារៈពាក់ព័ន្ធនៅបណ្ដាប្រទេស ភាគកណ្ដាល និងភាគខាងកើតអឺរ៉ុប”។ លោក Carter ថ្លែងនៅក្នុងសន្និសីទរួមគ្នា ជាមួយរដ្ឋមន្ត្រីការពារជាតិរបស់ប្រទេសតំបន់សមុទ្របាល់ទិក ៣រូបផ្សេងទៀត។
សព្វាវុធធុនធ្ងន់ទាំងអស់រួមមាន រថក្រោះ ២៥០គ្រឿង មធ្យោបាយដឹកជញ្ជូនកងថ្មើរជើង និងកាំភ្លើងធំមួយចំនួនទៀត។ លេខាធិការក្រសួងការពារជាតិអាមេរិក ក៏រំពឹងផងដែរថានឹងមានការប្រកាសនៅថ្ងៃពុធនេះ ទាក់ទងនឹងការបញ្ជូនយន្តហោះយោធាធុនធ្ងន់ ដើម្បីបញ្ជូនកងកម្លាំង NATO ទៅកាន់ចំណុចរសើបនៅជិតព្រំដែនរុស្ស៊ី។
ការបញ្ចេញសាច់ដុំរបស់សហរដ្ឋអាមេរិក ធ្វើឡើងបន្ទាប់ពីប្រធានាធិបតីដ៏មានឥទ្ធិពលរបស់រុស្ស៊ី Vladimir Putin ប្រកាសកាលពីពាក់កណ្ដាលខែឧសភានេះថា រុស្ស៊ីនឹងបន្ថែមកាំជ្រួចមីស៊ីលឆ្លងទ្វីបជាង ៤០គ្រាប់ទៀត ដើម្បីពង្រឹងកងកម្លាំងយោធារបស់ខ្លួននៅក្នុងឆ្នាំ២០១៥៕
ចុចអាន៖ រុស្ស៊ីនឹងបន្ថែមកាំជ្រួចឆ្លងទ្វីបជាង៤០គ្រាប់ទៀតនៅឆ្នាំ២០១៥ នេះ
ប្រែសម្រួល៖ គង់ វិសាល
ប្រភព៖ telegraph
