កំដរគេច្រើនដង មិនអាចរៀបការបាន?
ពេលរៀបអាពាហ៍ពិពាហ៍ គេតែងត្រូវការអ្នកកំដរកូនកំលោះក្រមុំ។ ប៉ុន្តែមានជំនឿមួយថា ចាស់ៗត្រណមមិនឲ្យធ្វើជាអ្នកកំដរគេច្រើនដងទេ ព្រោះអាច អភ័ព្វ មិនមានគូ។ ចុះបច្ចុប្បន្ន គ្រួសារខ្មែរយល់យ៉ាងណា ចំពោះជំនឿនេះ? ពួកគេជឿដែរឬទេ?
ទាក់ទិននឹងរឿងនេះ កញ្ញា សុ ម៉ាលីណា អ្នកលក់សំលៀកបំពាក់នៅផ្សារច្បារអំពៅ ប្រាប់ថា រឿងនេះធ្លាប់លឺគេនិយាយតគ្នាពីមាត់មួយទៅមាត់មួយយូរណាស់ហើយ។ គេថាបើកំដរការលើសពី៣ដង នឹងមិនអាចមានគូស្រករឡើយ។
ចំពោះជំនឿនេះ ម៉ាលីណាថា៖ “ជឿខ្លះៗដែរ សូម្បីម៉ាក់ខ្ញុំក៏ជឿដែរ។ ពេលមានគេសុំខ្ញុំទៅកំដរគេអ៊ីចឹង គាត់មិនចង់ឲ្យទៅទេ ខ្លាចអភ័ព្វគ្មានគូ ។ រឿងទាំងនេះយើងមើលមិនឃើញនឹងភ្នែក មិនច្បាស់ថាមែនឬអត់។ តែរឿងជំនឿគេថា បើមិនជឿកុំបំពាន។ ដូច្នេះ ខ្ញុំសុខចិត្តចៀសវាង ល្អជាង”។
រូបតំណាង
ចំពោះ លោក ប្រាថ្នា អតីតនិស្សិតផ្នែកសេដ្ឋកិច្ច នៅសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ច ប្រាប់ថា កាលនៅកំលោះលោកធ្លាប់កំដរគេច្រើនដងដែរ តែចុងក្រោយលោកនៅតែអាចរៀបការបាន។
បុរសទើបរៀបការរួចថ្មីៗក្នុងខែកុម្ភៈ ឆ្នាំនេះ បន្តថា ដំបូងៗភ័យដែរ គិតថា តិចដូចការលើកឡើងរបស់ចាស់ៗទៅ ព្រោះពេលស្រលាញ់នារីណា គេតែងតែក្បត់ចិត្ត មិនដែលស្រលាញ់គ្នាបានយូរទេ។ ប៉ុន្តែលោកថា ទោះយ៉ាងណា ទីបំផុតលោកនៅតែជួបនារីល្អម្នាក់ រហូតឥលូវបានរៀបការហ្នឹងគេដែរ។ ដល់អីចឹង លោកគិតថា ជំនឿនេះប្រហែលមិនត្រឹមត្រូវទេ។
និស្សិតម្នាក់ទៀត បូរ៉ា រស្មី សិក្សាផ្នែកអក្សរសាស្ត្រអង់គ្លេសនៅ IFL បញ្ចេញយោបល់ថា សម្រាប់លោកគឺមិនជឿសោះឡើយ ព្រោះស្ដាប់ទៅវាអត់មានអីត្រូវពាក់ព័ន្ធគ្នា។
រស្មី បន្ត៖ “ខ្ញុំគិតថា រឿងមិនមានគូអាចមកពីរឿងអីផ្សេង ជួនកាលគូព្រេងយើងមិនទាន់ដល់ក៏ថាបាន។ ម្យ៉ាងទៀត អ្នកដែលទៅកំដរការគេ ខ្ញុំឃើញច្រើននាក់ហើយ បានរៀបការទាំងអស់ហ្នឹង។សម័យនេះខ្ញុំមិនជឿរឿងអីចឹងៗទេ”។
ងាកមកលោក តា ស៊ុន ជាន អាចារ្យធំនៅវត្តព្រះដំរី មានប្រសាសន៍ថា នៅពេលរៀបអាពាហ៍ពិពាហ៍ គេត្រូវការអ្នកកំដរចំនួន៦នាក់ ស្រី៣ ប្រុស៣ សម្រាប់កំដរកូនក្រមុំនិងកូនកំលោះ។ ម្ចាស់ដើមការ តែងស្វែងរកអ្នកកំដរការណាដែលមានប្រវត្តិល្អ ដើម្បីជាសិរីសម្រាប់មង្គល។
ទាក់ទងនឹងជំនឿកំដររការគេ ច្រើនដងអាចអភ័ព្វនេះ ចំពោះលោកតាផ្ទាល់ យល់ថា មិនជឿឡើយ។ “គ្រាន់តែកំដរការ មិនអាចធ្វើឲ្យអ្នកណាម្នាក់អភ័ព្វ គ្មានគូស្រករទេ។ ខាងម្ចាស់ការ គេតែងសុំពរជ័យឲ្យបាននូវសិរីសួស្តី ទាំងអ្នកចូលរួម និងកូនកំលោះក្រមុំថ្មីថ្មោង ឲ្យជួបតែប្រការល្អៗ។ លើសពីនេះ គេរើសយកតែអ្នកដែលមានប្រវត្តិល្អទើបគេយកមកកំដរការ។ អ្នកដែលត្រូវគេសុំឲ្យកំដរការ ខាងម្ចាស់ដើមការតែងតែមានដាក់កញ្ចប់លុយឬគេនិយមហៅថាអាំងប៉ាវ បន្តិចបន្តួចសម្រាប់អ្នកកំដរការនោះ ព្រោះគេបានចំណាយពេលជួយម្ចាស់ដើមការ”៕
សម្រាប់ប្រិយមិត្ត ជឿលើជំនឿនេះឬទេ?
សូមអាន៖ គ្រាន់តែអត់ប៉ាម៉ាក់ជុំគ្នា គេមិនឱ្យធ្វើជាអ្នកកំដរមង្គលការ?
អត្ថបទ៖ លឹម សុនា
http://ift.tt/1NcH1ZP