ក្រុមការងារចម្រុះថ្នាក់ខេត្ត ចុះពិនិត្យដោះស្រាយបណ្តឹងប្រជាពលរដ្ឋ១២៦នាក់ ក្នុងរឿងប្រជាពលរដ្ឋម្នាក់ជីកកកាយយកដីលក់ប៉ះពាល់ផ្លូវលំ
ខេត្តកំពង់ឆ្នាំង៖ ដោយមានបណ្តឹងរបស់ប្រជាពលរដ្ឋចំនួន១២៦នាក់ នៅភូមិស្មែត ឃុំស្វាយជ្រុំ និងភូមិត្រពាំងពោធិ៍ ឃុំពង្រ ស្រុករលាប្អៀរ ស្នើសុំអោយអ្នកជីកកកាយយកដីធ្វើអោយប៉ះ ពាល់ផ្លូវលំមួយខ្សែប្រវែងជាង៦០ម៉ែត្រកន្លងមក នៅព្រឹកថ្ងៃទី២២ ខែមិថុនា ឆ្នាំ២០១៥ ក្រុមការងារចម្រុះថ្នាក់ខេត្តដឹកនាំដោយលោក ម៉ម ឈឿម ប្រធានមន្ទីរព័ត៌មានខេត្ត និងជាប្រធានក្រុមការងារថ្នាក់ខេត្តរ បានដឹកនាំក្រុមចំរុះរួមមាន មន្ទីរសាធាណការខេត្ត មន្ទីរអធិការកិច្ចទំនាក់ទំនងព្រឹទ្ធសភានិងរដ្ឋសភាខេត្ត មន្ទីរដែនដីនគររូបនីកម្មនិងសុរិយោដីខេត្ត មន្ទីររ៉ែនិងថាមពលខេត្ត និងអាជ្ញាធរភូមិឃុំស្រុក ចុះទៅពិនិត្យស្ថានភាពផ្លូវជាក់ស្តែងនៃរឿងទំនាស់ ដើម្បីរកដំណោះ ស្រាយជូនប្រជាពលរដ្ឋទាំងសងខាង។
នៅក្នុងបណ្តឹងរបស់ប្រជាពលរដ្ឋទាំង២ភូមិចំនួន១២៦នាក់បានបញ្ជាក់អោយដឹងថា៖ ផ្លូវមួយខ្សែ ចេញពីភូមិស្មែត ទៅកាន់ភូមិត្រពាំងពោធិ៍ តាមបណ្តោយជើងភ្នំក្រាំងដីមាស កន្លងមកប្រជាពល រដ្ឋធ្លាប់ ធ្វើដំណើរចេញចូលជាយូរមកហើយ ត្រូវបានលោក កាន់ ប៊ុនសេង ជាប្រជាពលរដ្ឋ នៅក្នុង ភូមិស្មែត ឃុំស្វាយជ្រុំ ជីកកកាយយកដីទៅលក់ធ្វើអោយប៉ះពាល់ដាច់ផ្លូវប្រវែង៦០ម៉ែត្រ ជាហេតុធ្វើ អោយប្រជាពលរដ្ឋលំបាកក្នុងការធ្វើដំណើរទៅមក។ ប្រជាពលរដ្ឋសុំសំណូមពរអោយ ក្រុមការ ងារថ្នាក់ខេត្ត ជួយដោះស្រាយជួសជុលផ្លូវមួយខ្សែនេះឡើងវិញជូនប្រជាពលរដ្ឋដើម្បីបានធ្វើដំណើរ។
លោក កាន់ ប៊ុនសេង ដែលរងចោទប្រកាន់ពីប្រជាពលរដ្ឋបានអោយដឹងថា៖ ផ្លូវលំនោះជាដាន ផ្លូវចាស់ ដែលកន្លងមកលោកធ្លាប់ជីកកាយយកដីក្នុងស្រែនៅក្បែរៗនោះ តែមិនប៉ះពាល់ដល់ផ្លូវមួយ ខ្សែនោះទេ ប៉ុន្តែដោយសារជំនន់ទឹកភ្លៀងក្នុងឆ្នាំកន្លងមក ធ្លាក់ពីលើភ្នំបានធ្វើអោយផ្លូវមួយខ្សែនេះ រងការខូចខាតប្រវែង៦០ម៉ែត្រនោះទៅ។ ក្រោយមកដោយមានការសំរបសំរួលពីក្រុមការងារ ថ្នាក់ ខេត្តពីមុនមក លោកបានជួយជួសជុលផ្លូវនោះឡើងវិញចំនួន២ដងរួចមកហើយ ដោយបានពង្រីក ផ្លូវនេះ បានធំជាងមុន និងបានដាក់លូមុខកាត់០,៨០ម៉ែត្រ២កន្លែងដើម្បីអោយទឹកហូរកាត់ តែដោយ កំលាំងទឹកហូរបុកខ្លាំង ក៏ធ្វើអោយលូទាំង២កន្លែងរំដោះទឹកពុំទាន់ ក៏ធ្វើអោយខូចខាតទៀត ជាបន្ត បន្ទាប់។លោកនិយាយយថា សូមអោយប្រជាពលរដ្ឋទាំងអស់មកចង្អុលប្រាប់ថា តើត្រូវធ្វើផ្លូវនេះបែប ណា និងដាក់លូធំប៉ុនណា ដើម្បីអោយក្រុមការងារថ្នាក់ខេត្តបានដឹង ដើម្បីលោកជួយធ្វើតាមអោយ បាន។
លោក ម៉ម ឈឿម ប្រធានក្រុមការងារចំរុះថ្នាក់ខេត្តបានថ្លែងអោយដឹងថា៖ កន្លងមកក្រុម ការងារ ថ្នាក់ខេត្តដែលដឹកនាំដោយលោក សោម សុជាតា ប្រធានមន្ទីរអធិការកិច្ច និងទំនាក់ទំនងព្រឹទ្ធ សភារដ្ឋសភាខេត្ត បានធ្វើការសំរបសំរួលម្តងរួចមកហើយ អោយលោក កាន់ ប៊ុនសេង ជួសជុល ផ្លូវនោះឡើងវិញផងដែរ ប៉ុន្តែប្រជាពលរដ្ឋគាត់មិនទាន់ទទួលយកបាន។នៅព្រឹកថ្ងៃទី២២ ខែមិថុនា ឆ្នាំ២០១៥នេះ លោក និងក្រុមការងារថ្នាក់ខេត្ត ត្រូវចុះមកពិនិត្យម្តងទៀត នឹងត្រូវដោះស្រាយជូន ប្រជាពលរដ្ឋតាមគោលនយោបាយឈ្នះឈ្នះរបស់ប្រមុខរាជរដ្ឋាភិបាល ដោយក្រុមការងារចម្រុះ បានកំណត់ថ្ងៃទី២៥ ខែមិថុនា ឆ្នាំ២០១៥ខាងមុខនេះ ជាថ្ងៃត្រូវប្រជុំភិភាក្សាគ្នាជាមួយលោក កាន់ ប៊ុនសេង និងតំណាងប្រជាពលរដ្ឋទាំង២ភូមិ ដើម្បីសំរបសម្រួលដោះស្រាយគ្នាបញ្ចប់ រឿងវិវាទខាងលើ ជូនប្រជាពលរដ្ឋទាំងសងខាង អាចទទួលយកបានទាំងអស់គ្នា៕ ដោយ រិទ្ធិ ជ័យ
http://ift.tt/1NgRtAe
