អតីតយុទ្ធជនម្នាក់ក្រីក្រតោកយ៉ាកមាន«ប័ណ្ណសមធម៌ជនក្រីក្រប្រភេទ១» មានលុយតែ៥ពាន់រៀលតែពេទ្យទារ១ម៉ឺនរៀលថ្លៃសេវាព្យាបាល គ្មានលុយបង់គ្រប់ ទីបំផុតត្រឡប់ទៅផ្ទះវិញទាំងទឹកភ្នែក
ខេត្តកំពង់ឆ្នាំង៖ លោក លឹម វ៉ាន់ដារ៉ា អាយុ៦០ឆ្នាំ ជាអតីតៈកងទ័ព( ឈ្មោះ សែម ប៊ុនហេង ) ជាគ្រួសារក្រីក្រតោកយ៉ាក និងភរិយាឈ្មោះ នូ សុភាព អាយុ៤២ឆ្នាំ មានកូនប្រុសម្នាក់អាយុ១១ឆ្នាំ រស់នៅក្នុងភូមិចំការឃ្លៃ ឃុំស្វាយជ្រុំ ស្រុករលាប្អៀរ បានរងការរិះគន់ថា លោកបាននិយាយប្រាប់អ្នកកាសែតនូវរឿងមិនពិត ដោយថាកាលពីថ្ងៃ០៤ ខែមករា ឆ្នាំ២០១៦ លោកបានទៅសុំពិនិត្យសុខភាព នៅមន្ទីរពេទ្យបង្អែកខេត្តកំពង់ឆ្នាំង គ្មានប្រាក់បង់សេវាអោយមន្ទីរពេទ្យខេត្តចំនួន១ម៉ឺនរៀល និងមិនត្រូវបានគ្រូពេទ្យខេត្តពិនិត្យសុខភាព និងព្យាបាលជម្ងឺអោយឡើយ ហើយគាត់ក៏បាននិយាយរឿងនេះអោយអ្នកកាសែតដឹង និងបានចុះផ្សាយធ្វើអោយមានប្រតិកម្មពេញស្ថាប័នមន្ទីរពេទ្យខេត្ត និងថ្នាក់លើ ទំនងជាអៀនខ្មាស់នឹងអំពើគ្មានមនុស្សធម៌។
ដើម្បីបញ្ជាក់រឿងនេះ នៅព្រឹកថ្ងៃទី០៦ ខែមករា ឆ្នាំ២០១៦នេះ អ្នកយកព័ត៌មានយើងបានជួបលោក លឹម វ៉ាន់ដារ៉ា អតីតៈយុទ្ធជន នៅក្នុងលំនៅដោយផ្ទាល់ ហើយលោកបាននិយាយនៅក្នុងខ្ទមរហែកធ្លុះធ្លាយដំបូល និងជញ្ជាំងដែលមានពន្លឺព្រះអាទិត្យចាំងចូលទាំងស្រងូតស្រងាត់ថា៖ លោកមានស្រុកកំណើតក្នុងស្រុកស្អាង ខេត្តកណ្តាល បានចូលបំរើកងទ័ពក្នុងឆ្នាំ១៩៨៥ នៅក្នុងអង្គភាពយោធាខេត្តបាត់ដំបង ដែលកាលណោះលោកមានឈ្មោះ សែម ប៊ុនហេង បន្ទាប់មកបានផ្លាស់មកនៅអង្គភាពវរៈ៦ យោធាខេត្តកំពង់ឆ្នាំងការពារស្ពានស្រះអង្កាម ហើយបានផ្លាស់មកនៅកងពលលេខ៧០ កាលណោះមានលោក អ៊ិន ស៊ីដារ៉េ ជាមេកងពល។ នៅឆ្នាំ១៩៩៦ លោកបានរងរបួសខ្នងនៅក្នុងសមរភូមិភ្នំព្រឹកខេត្តបាត់ដំបង ដោយសារមិត្តភ័ក្រនៅក្បែរគាត់ជាន់ម៉ីន ក្នុងពេលប្រយុទ្ធប្រយុទ្ធជាមួយពួកខ្មែរក្រហម។ ពេលនោះគាត់ និងមិត្តភ័ក្រម្នាក់ទៀតបានរងរបួស និង២នាក់ទៀតបានពលីជិវិត។
នៅក្នុងឆ្នាំ១៩៩៧គាត់មានឋានះអនុសេនីយទោ ជំនួយការចាត់តាំងកងពលលេខ៧០ និងបានសុំឈប់ពីកងទ័ពព្រោះតែ មានរបួសធ្វើការធ្ងន់មិនកើត ហើយក៏បានយកប្រពន្ធរស់នៅជាមួយគ្នាដល់សព្វថ្ងៃ។ រូបគាត់ និងប្រពន្ធបច្ចុប្បន្នគ្មានឪពុកម្តាយ ឬបងប្អូនទេ ដីស្រែបានលក់មើលជម្ងឺម្តាយអស់ហើយមុនពេលគាត់ស្លាប់ ចំណែកមុខរបរប្តីប្រពន្ធសព្វថ្ងៃ ជាកម្មករកាប់គាស់ដី ឬបោកគក់លាងចានឆ្នាំងអោយគេដើម្បីរកលុយទិញបាយហូបទាំងខ្វះខាតម្តងមួយកាល។ ហើយសព្វថ្ងៃមានដីទំហំ៩ម៉ែត្រគុណ នឹង១៣ម៉ែត្រ បានសង់កូនខ្ទមស្លឹកតូចមួយរស់នៅដូចលោកអ្នកបានឃើញក្នុងរូបភាពនេះស្រាប់។ ហើយ ពេលមានជំងឺជីវភាពខ្វះខាតមុខខ្វះក្រោយគ្មានលុយព្យាបាលទេ ជួនកាលតាមព្រេងវាសនាគ្មានទីពឹង។
លោក លឹម វ៉ាន់ដារ៉ា បានរៀបរាប់ឲ្យដឹងទៀតថា៖ នៅក្នុងខែ១១ ឆ្នាំ២០១៥ ដោយលោកមានជំងឺថ្លើមរាំរ៉ៃ ជំងឺឈាមសស៊ីឈាមក្រហម ចេះតែឈឺចុកចាប់ស្នាមរបួសលើឆ្អឹងខ្នង និងចេះតែធ្លាក់ឈាមតាមច្រមុះ លោកក៏បានកាន់ «បណ្ណ័សមធម៌ជនក្រីក្រប្រភេទ១» ទៅសុំពិនិត្យសុខភាព និងព្យាលបាលជម្ងឺនៅមន្ទីរពេទ្យខេត្ត។ នៅពេលចុះឈ្មោះសុំពិនិត្យសុខភាព គ្រូពេទ្យខេត្តតម្រូវអោយបង់សេវា១ម៉ឺនរៀល តែលោកមានប្រាក់តែ៥ពាន់រៀល គ្រូពេទ្យថាមិនពិនិត្យសុខភាពឲ្យទេ លោកក៏បានត្រឡប់មកផ្ទះវិញទាំងទឹកភ្នែកហេតុតែក្រគ្មានលុយ វិលមកវិញទាំងឈឺ។ #ដោយឡែកនៅថ្ងៃទី០៤ ខែមករា ឆ្នាំ២០១៦ នេះលោកបានទៅមន្ទីរពេទ្យខេត្តម្តងទៀត តែពេលចូលដល់ក្លោងទ្វារមន្ទីរពេទ្យខេត្ត បានជួបនារីម្នាក់យល់ថាជាគ្រូពេទ្យ បានសួរថា ខ្ញុំមានប័ណ្ណក្រីក្រសុំពិនិត្យសុខភាពគ្រូពេទ្យយកលុយ ឬអត់ នារីនោះឆ្លើយថាពេទ្យ យកណាពូតែតិតតួចមិនច្រើនទេ ពេលនោះលោកអត់លុយក៏ត្រឡប់មកវិញចូលទៅមន្ទីរព័ត៌មានខេត្ត បំណងសុំអំណោយគេ ក៏បាន ជួបជាមួយអ្នកកាសែត និងបានប្រាប់ដំណើររឿងពីមុនមកទៅ តែការផ្សាយមិនផ្សាយគឺជារឿងរបស់អ្នកកាសែត។
ទាក់ទងនឹងរឿងខាងលើនេះនៅព្រឹកថ្ងៃទី០៦ ខែមករា ឆ្នាំ២០១៦នេះ លោក សូរិន្ទី រ៉ាវុឌ្ឍី ប្រធានមន្ទីរពេទ្យបង្អែកខេត្តកំពង់ឆ្នាំងបានបញ្ជាក់ថា៖ ការពិនិត្យ និងព្យាលជម្ងឺចំពោះជនក្រីក្រមានប័ណ្ណសមធម៌ មន្ទីរពេទ្យខេត្តមិនយកប្រាក់មួយរៀលឡើយ គឺអង្គការរ៉ាក់ដែលជាអ្នកចេញបណ្ណ័សមធម៌អោយ ជាអ្នកចេញប្រាក់អោយមន្ទីរពេទ្យខេត្តជំនួសជនក្រីក្រ។ #លោក សូរិន្ទី រ៉ាវុឌ្ឍីបន្តថា តាមការស្រាវជ្រាវឯកសារក្នុងខែ១១ ឆ្នាំ២០១៥ លោក លឹម វ៉ាន់ដារ៉ា ពិតជាបានមកសុំពិនិត្យសុខភាពមែន តែពេលគ្រូ ពេទ្យទាមទារអោយបង់ប្រាក់ថ្លៃសេវា១ម៉ឺនរៀល គាត់អត់ប្រាក់បង់គ្រប់ គ្រូពេទ្យអោយគាត់ទៅជួបមន្ត្រីអង្គការរ៉ាក់ នៅក្នុងមន្ទីរ ពេទ្យ ខេត្តអោយគាត់បង្ហាញប័ណ្ណសមធម៌ ដើម្បីអង្គការរ៉ាក់ចេញប័ណ្ណបង់ប្រាក់ជំនួស តែគាត់មិនទៅជួបគេទេបែរជាត្រឡប់ទៅផ្ទះវិញ ហើយដើរនិយាយថា គ្មានលុយ១ម៉ឺនរៀលគ្រូពេទ្យខេត្តមិនពិនិត្យសុខភាពអោយទេ ដែលជារឿងខុសពីការពិតធ្វើអោយថ្នាក់លើមានប្រតិកម្មជាមួយមន្ទីរពេទ្យខេត្ត។
ដោយប៉ះពាល់កេរ្តិ៍ឈ្មោះខេត្តកំពង់ឆ្នាំង លោក ម៉ម ឈឿម ប្រធានមន្ទីរព័ត៌មានខេត្ត និងជាអ្នកនាំពាក្យខេត្ត បានអោយដឹងថា នៅព្រឹកថ្ងៃទី០៥ ខែមករាឆ្នាំ២០១៦ លោកបានកោះហៅលោក លឹម វ៉ាន់ដារ៉ា មកសួរនាំនៅក្នុងមន្ទីរព័ត៌មានខេត្ត ហើយទំនងជាលលោកដារ៉ា ភិតភ័យ បានឆ្លើយត្រឡប់ត្រឡិនម្តងថាបានចូលពេទ្យខេត្ត ហើយម្តង បានឆ្លើយប្រាប់ក្រុមការងារមន្ទីរសុខាភិបាលខេត្តថា មិនបានចូលពិនិត្យសុខភាពក្នុងពេទ្យខេត្តនោះទេ។ ហើយមន្ត្រីសួរនាំទម្លាក់បន្ទោសថាលោកដារ៉ា ដូចជាមានការចងចាំមិនសូវល្អពិបាកនឹងជឿ។ ប៉ុន្តែមន្ត្រីអ្នកនាំពាក្យខេត្តសាលាខេត្តកំពង់ឆ្នាំងទទួលស្គាល់ថា ក្រុមគ្រួសារលោកដារ៉ាពិតជាក្រីក្រពិតមែន។ ក្រុមការងារក្នុងខេត្តក៏ធ្លាប់បានផ្តល់អំណោយ២ទៅ៣ដងហើយដែរ។
ជាមួយគ្នានេះ លោក ម៉ម ឈឿម ប្រធានមន្ទីរព័ត៌មានខេត្ត និងជាអ្នកនាំពាក្យខេត្ត សំណូមពរដល់អ្នកលេងសង្គមហ្វេហ្វេសប៊ុក និងអ្នកកាសែត សូមស្រាវជ្រាវព័ត៌អោយបានច្បាស់លាស់ និងមានតុល្យភាពមុននឹងធ្វើការចេញផ្សាយ ជៀសវាងការទម្លាក់កំហុសដល់ស្ថាប័នណាមួយឲ្យខូចកេរ្តិ៍ឈ្មោះ ដោយយើងមិនបានសាកសួរព័ត៌មាននោះអោយបានច្បាស់លាស់តាមវិជ្ជាជីវនោះ។ ចំណែក មតិពីអ្នកលេងហ្វេសប៊ុកថា មន្ត្រីគួរមានសេចក្តីក្លាហានទទួលខុសត្រូវកំហុស និងព្យាយាមកែតម្រូវកំហុសជៀសជាងឆ្នៃសភាពរឿងទម្លាក់ឲ្យអ្នកនេះឲ្យអ្នកនោះគេចវេសទទួលស្គាល់ការពិតដែលជាទង្វើលាក់លាមបិទបាំងការពិតវាគ្មានអ្វីជំណេញដល់សង្គម ជាតិ៕ រិទ្ធិ ជ័យ
http://ift.tt/1MVaIwo
