បុរីសំណង់លោកឧកញ៉ា អ៊ូ ឆាយ កំពុងរងការិះគន់គ្រាដែលមន្ត្រីជំនាញនិងម្ចាស់សំណង់អះអាងថាត្រឹមត្រូវតាមលក្ខណៈបច្ចេកទេស
ខេត្តព្រះសីហនុ៖ ការរិះគន់ និងរួមជាមួយការសម្តែងក្តីព្រួយបារមណ្មជាច្រើនពីក្រុមប្រជាពលរដ្ឋ ជុំវិញការសាងសង់សំណង់ផ្ទះល្វែងរបស់លោកឧកញ៉ា អ៊ូ ឆាយ បានកើតឡើងពីមួយថ្ងៃទៅមួយថ្ងៃ គ្រាដែលសំណង់មួយនេះមើលទៅហាក់ ពុំត្រឹមត្រូវតាមលក្ខណៈបច្ចេកទេសនៃការសាងសង់ត្រឹមត្រូវ តែដំណើរការ ពុំត្រូវបានមានការរំខានពីអាជ្ញាធរមូលដ្ឋាន ឬអស់លោកមន្ត្រីជំនាញនោះទេ ដោយសារឥទ្ធិពលលោកឧកញ៉ា ។
ស្ថិតនៅចំកណ្តាលទីប្រជុំជនក្រុងព្រះសីហនុ អតីតមហោស្របរបស់ខេត្តព្រះសីហនុ កំពុងបានក្លាយទៅជាសំណង់ផ្ទះល្វែងជាច្រើនរបស់លោកឧកញ៉ា អ៊ូ ឆាយ ដែលកំពុងសាងសង់សម្រាប់លក់ ។ ប៉ុន្តែការសាងសង់នោះបានធ្វើអោយប្រជាពលរដ្ឋ រិះគន់ទៅលើសំណង់ទាំងនោះ ហើយបានបញ្ចេញទស្សនៈស្រដៀងៗគ្នា ថ្វីត្បិតតែពួកគាត់មិនមែនជាក្រុមបច្ចេកទេសជំនាញយ៉ាងណាក្តី ប៉ុន្តែពួកគាត់មានក្តីបារម្មណ៍ទៅថ្ងៃអនាគត់ចំពោះអតិថិជន ដែលបានទិញផ្ទះល្វែងនេះ ព្រោះបើមើលទៅជាក់ស្តែង សំណង់មួយនេះ ហាក់ពុំបានសាងសង់តាមលក្ខណៈបច្ចេកទេសនោះទេទាំងសសៃដែក សសរគ្រឺះ ប្លង់សេ ជាដើម ។ល។ ហើយពលរដ្ឋសង្ស័យថាមន្ត្រីជំនាញដេកលក់។ហេតុនេះក្នុងនាមពួកគាត់ជាប្រជាពលរដ្ឋ ជាអតិថិជន សូមស្នើយ៉ាងទទួចដល់មន្ត្រីជំនាញផ្នែកសំណង់នៅខេត្តព្រះសីហនុ សូមមេត្តា ចុះពិនិត្យការដ្ឋានសំណង់នេះដើម្បីបញ្ចៀសគ្រោះថ្នាក់នៅថ្ងៃអនាគត។
ជុំវិញការនិយាយតៗគ្នាទៅលើសំណង់ លោកឧកញ៉ា អ៊ូ ឆាយ នេះ លោក ប្រាក់ កេត ប្រធាន ផ្នែកសំណង់នៃភូមិបាលក្រុងព្រះសីហនុបានអះអាងថា ចំពោះការសាងសង់សំណង់ផ្ទះល្វែងរបស់លោកឧកញ៉ា អ៊ូ ឆាយ នេះ គឺពិតជាត្រឹមត្រូវតាមលក្ខណៈបច្ចេកទេសមិនមែនអ្វីខុសនោះទេ។ ជាទូទៅសម្រាប់ផ្ទះល្វែង គេតែងចាក់ប្លង់សេ កម្រាស់តែ៨ហ៊ុនប៉ុណ្ណោះ វាខុសពីផ្ទះលក្ខណៈភូមិគ្រឹះកម្រាស់ចាប់ពី១តឹកឡើងទៅ១តឹកកន្លះ។ ចំណែកសសរវិញវាមិនមែនបញ្ហានោះទេ ព្រោះសំណង់ផ្ទះល្វែងនេះប្លង់សេតែ៣ស្លឹកតែប៉ុណ្ណោះ។
ដោយឡែក លោក ហ៊ុន ភី ប្រធានមន្ទីរៀបចំដែនដីនគររូបនីយ៍កម្ម សំណង់ និងសុរិយោដីខេត្តព្រះសីហនុ បានអះអាងស្រដៀងគ្នា ទៅនឹងលោក ប្រាក់ កេត ថា ការសាងសង់នេះវាមិនខុសលក្ខណៈបច្ចេកទេសដូចការរិះគន់នោះទេ បើទោះបីជាយើងមើលទៅវាមានលក្ខណៈរាងរាវបន្តិចក្តី ចំពោះការចុះត្រួតពិនិត្យពីមន្ត្រីជំនាញរបស់លោក វានៅមានភាពឆក់ល្វែង លោកសូមទទួលស្គាល់ ព្រោះមន្ត្រីជំនាញរបស់លោក មានគ្នាតិចតួច ពុំអាចចុះពិនិត្យអោយបានដិតដល់នោះទេ។
លោកឧកញ៉ា អ៊ូ ឆាយ បានអះអាងថា សំណង់របស់លោក គឺបានសាងសង់តាមលក្ខណៈបច្ចេកទេសសុទ្ធសាធ មិនកេងដែក ឬស៊ីម៉ង់នោះទេ គឺផ្អែកទៅលើគុណភាពជាចំបង ចំពោះប្លង់សេសំណង់របស់លោក គឺមានកម្រាស់រហូតដល់០៩ហ៊ុនដូចនេះលោកឧញ្ញ៉ា សូមច្រាលចោលនូវពាក្យរិះគន់នេះទាំងស្រុង៕ សមុទ្រខៀវ
http://ift.tt/20VFq2o
